Si Kombangen di Gunung Tatawiran

Karya: Belarmino M. Lapong

ADA satu gunung basar, baku sei deng Gunung Lokon. De pe nama Gunung Tatawiran. Depe cirita, ini gunung orang percaya boleh tembus di atas awan. Orang lei percaya Gunung Tatawiran jadi tangga vor mo pigi di dunia para opo ato leluhur.

Di jaman dulu, pas di kaki Gunung Tatawiran, ada satu orang muda yang hidop di situ. Dorang biasa ja pangge, Sero.  Hari-hari depe karja cuma makang kong tidor. Pas dia tidor salalu manggoro pe kuat. So itu depe badan so pe basar, lebe deri orang-orang laeng. 

Ni Sero boleh seabis nasi satu blanga basar pa depe rumah. Satu waktu, Sero pe mama deng papa pernah veto pa dia, lantaran nasi deng ikang baru beking dia so seabis satu kali. Depe laste nda ada sisa vor orang di rumah. Abis itu depe mama deng papa marah basar pa dia. 

So pastiu hari-hari Sero pe karja cuma babagitu. Paling parah, pernah ada pesta basar di kampung. Orang-orang sibuk momasa di muka. Klar momasa, tu makanan da simpang di satu rumah. Karna so lapar, Sero tabangun deri tidor, dia ta ciong akang bobou sadap deri makanan yang orang-orang da simpang di satu rumah. 

Dia bangun kong dia cari tu bobou sadap itu deri mana. Memang pe rakus skali. Pas dia pi dapa tu tampa da simpang akang makanan itu, dia iko makang nentau diri. Serta so kanyang, baru sadar tu makanan kote so abis dia da makang. 

Karna so tako, dia mo lari deri itu rumah. Pas somo lari, ada om riki pa dia. Om so lia, Sero so makang abis tu makanan. Om iko ba taria, “Hoiii, lia ka sana ini, dia so makang enteru tu makanan torang ada beking!”

Pe dengar om so bataria, orang-orang yang ada ba momasa di muka langsung 

takumpul samua. Odoh, riki ba asap dorang pe kapala karna tu makanan yang dorang so momasa dari kalamaring so abis Sero da makang. 

Sero so tako. Riki totofore dia. Orang-orang so marah, dorang so ser mo pukul pa dia. Pas orang-orang so nae darah mo bage pa Sero, tu om yang tadi ada bataria pigi ka muka. Dia bilang, “Dengar dulu. Lebe bae torang bawa dulu pa de pe mama deng papa. Torang minta ganti tu makanan samua ini.”

Akhirnya dorang tangka pa Sero, kong dorang bawa ka rumah. Sampe pa depe rumah, Sero pe mama deng papa da sadap-sadap baserop kopi. Riki takage dorang, pe banya skali orang ada datang. Apalagi waktu lia Sero dorang so ika di tangan. 

Pe sampe, orang-orang iko ba taria, “Hoi, lia ngoni pe anak ni dia. So makang abis tu torang ada momasa di sablah. Pokoknya ganti ini samua!”

Sero pe orang tua kage, riki nae darah dorang dua. Marah skali dorang pa Sero.

“Sini ngana anak!”

Sero dengan muka pucat kong totofore, plang-plang pigi maso pa depe rumah. Akhirnya depe mama deng papa ganti samua tu makanan yang Sero ada makang. Depe papa katu pi cabu ubi deng potong pisang, depe mama iko ambe sayor di kobong. Tamba lei dorang kase akang satu babi utang ada piara pa tuang pesta. 

Mulai itu, orang-orang kampung kase nama baru pa Sero, Kombangen. Depe arti, tukang makang banya. Orang di kampung so nyanda lagi pangge pa dia Sero, mar Kombangen. 

Abis itu, Sero nda tobat. Amper salalu dia biking masalah. Depe mama deng papa so terlanjur marah skali pa dia. Akhirnya, dorang ada rencana. Dorang mo kase tinggal pa Sero ato Kombangen ni dia di utang, di atas Gunung Tatawiran. 

Satu hari, Kombangen depe papa pangge ka kobong yang jao di utang.

“Mari jo, bantu akang pa papa mo pigi buka kobong baru di gunung!”

Kombangen iko sanang. Dia semangat skali mo iko pa depe papa. Waktu ka kobong, Kombangen ada pikul tas yang depe isi makanan vor dorang mo makang klar karja. 

Di kobong, sementara depe papa ba pacol, Kombangen so lapar skali. Akhirnya dia makang abis tu makanan. Klar makang dia iko tidor. Dia tidor di dalam lobang yang dia rasa nyaman deng dingin. 

Pe klar karja, depe papa takage luar biasa. So lalah deng so lapar, depe papa lia makanan so abis. 

Odoh ba asap tu kapala. Mar kombangen masih da tidor sadap. Dia nentau depe papa so sama deng tomat masa tu muka, lantaran merah ba marah.

Akhirnya Kombangen pe papa tola tu batu basar di pinggir lobang, kase tutup di atas lobang. Dengan itu dia pikir mo kurung dulu tu Kombangen di dalam. 

Dasar kwa memang kuat Kombangen ni dia. Blum lama depe papa sampe di rumah, riki ta tigo pas ba minum. Depe papa so dengar Kombangen pe suara di muka rumah. 

“Ma … pa … Napa e kita so bawa akang batu basar. Gaga mo beking akang dodika di dapur. Mar kita so lapar!”

Yah, mo beking apa. Niat mo kurung dulu, napa dia so di rumah ulang. Akhirnya Kombangen dapa makang di rumah. 

Sementara dia bamakang, depe mama deng papa so ada niat laeng. Dorang so tau, ini Kombangen badan basar mar masih bodok. 

“Eey, Kombangen, capat jo ba makang. Capat ba siap. Torang mo lari, Gunung Lokon mo ba polote. Ngana ba lebe dulu ka utang, nanti mama deng papa menyusul!” Bagitu depe mama bilang. 

Bulum riki klar tu ja makang, Kombangen pe capat ada lari ka utang di atas Gunung Tatawiran. Dia lari trus, nda ba tarukira jalang. Pas brenti, so riki malam. Kombangen nentau jalan pulang.

Hari so bajalang trus, so brapa bulan, Kombangen ta ilang di utang. Dia jadi tukang bapontar di utang. Dia cuma makang apa yang ada di utang. Dia makang samua yang dia dapa. Mo binatang, sampe pohong abis tu daong dia makang. 

Akhirnya samua somo abis di utang. Depe akibat, so nyanda seimbang tu yang ada di utang. Karna Kombangen ada makang samua. 

Pe lia tu utang so rusak, marah tu opo-opo yang tinggal di atas Gunung Tatawiran. Akhirnya dorang suru opo yang tinggi depe badan. Depe nama, Opo Siow Kuruz. Siow Kuruz depe arti sembilan buku-buku. 

Dorang suru ini Opo Siow Kuruz vor mo kase brenti ni Kombangen pe rakus makang-makang samua tu di atas gunung. Pas ni Opo Siow Kuruz babajalang, dia ta bakudapa deng Kombangen.

“Hey, Kombangen. Brenti jo beking rusak tu utang. Samua ngana so makang. So nyanda ada sisa vor orang laeng!” 

Kombangen dengar itu, iko marah dia. Kong dia bilang pa Opo Siow Kuruz, “Heh … biar ngana pe tinggi di atas jao pa kita, mar ngana kurus kering. Boleh kita mo kase ojo ngana di situ!”

Kombangen rupanya mo tantang pa Opo Siow Kuruz, mo baku adu kekuatan. Pertama, dorang adu alat perang, seimbang kote’ dorang dua. Kadua, dorang ada baku rebe sapa lebe dulu sampe di atas puncak gunung. Nah, ini karna Kombangen pe gode’, Opo Siow Kuruz menang. Katiga, Kombangen tantang adu angka brat. Ini komang karna dia kuat, badan besar, Kombangen tu untung. 

Ternyata kote dorang baku empas, ato seri. So lalah dorang. Opo Siow Kuruz tantang terakhir pa Kombangen.

“Bagini jo, tantangan terakhir. Torang potong ini puncak gunung Tatawiran kong pikul. Ngana di darat, kita di laut. Kal ngana kalah, ngana musti ba janji mo berubah kong jadi orang bae!”

Lantaran tau dia kuat, Kombangen langsung trima tu tantangan.

Dengan Opo Siow Kuruz pe kekuatan, puncak Gunung Tatawiran iko ta potong. Pertama, Kombangen yang ba pikul. Opo Siow Kuruz da duduk ba lia dari atas gunung. Mo lia jang kage Kombangen ba ruci. 

Kombangen ini memang kuat, mar capat ja lalah lantaran lapar. Bulum stengah perjalanan di arah barat laut, dia so lalah. Pas Opo Siow Kuruz nda ba tarukira, Kombangen ja pela plang-plang tu dia da pikul kong lempar sepanjang dia da ba jalang akang. 

Abis itu giliran Opo Siow Kuruz. Dia ba pikul dari pante sampe tenga laut. Sebenarnya Opo Siow Kuruz boleh sampe di tenga laut dengan cuma sembilan kali ba langkah. Mar depe kelemahan, dia nda sama kuat deng Kombangen.

Yah, sama jo kote deng Kombangen. Karna nda mampu, Opo Siow Kuruz ja pela satu-satu tu tanah puncak Gunung Tatawiran dia ada bawa. Klar pela, Opo Siow Kuruz lempar ka sana-kamari di laut pas Kombangen nda lia. 

Mulai peristiwa itu, opo-opo dengan manusia di kaki gunung pe hubungan taputus karna tu Gunung Tatawiran kurang pende. Tu tanah yang dorang ja pela-pela itu ternyata ta ambor di mana-mana. Bagian yang Kombangen ada buang akhirnya berubah jadi bukit yang orang kampung ja bilang perbukitan Winerenan im Bengkow. Depe arti, lurus mar dapa lia bengko.

Ini tu bukit-bukit yang ja dapa lia dari Lolah-Lemoh skarang. Orang-orang senama tu bukit-bukit itu, Wawona, Wale ne Ko’ko, Tepa dan sebagainya. Sedangkan tu bagian tanah yang Opo Siow Kuruz ada lempar di laut, berubah jadi pulau-pulau. Pulau-pulau yang skarang orang ja pasiar akang. Pulau Bunaken, Mantehage, Siladen deng pulau laeng pa depe sekitar. 

Tu puncak yang dorang ada bawa, akhirnya jadi Pulau Manado Tua. So itu depe bentuk kerucut, lantaran puncak Gunung Tatawiran yang Opo Siow Kuruz ada potong. 

Lantaran di tantangan terakhir ini dorang baku empas, Kombangen mengaku depe kesalahan, kong dorang baku kase tangan. Kombangen ba janji so nyanda mo kase rusak utang, so nda mo jadi serakah. Kong Opo Siow Kuruz kase tugas pa dia. Kombangen musti jaga tu utang jangan pernah kase rusak. Akhirnya dorang baku teman, sama-sama baku jaga deng baku piara tu utang deng samua yang hidop di utang. 

(Disadur dari Cerita Rakyat Desa Taratara)